Tomás na hOrdóige
Pacáiste Scéalta, Drámaí agus Cluichí do Mhúinteoirí Bunscoile
Ábhar teagaisc praiticiúil agus spraíúil chun Gaeilge a mhúineadh sa bhunscoil trí scéalta, drámaíocht, pictiúir agus puipéid.
NASC: Íoslódáil na póstaeir a théann leis an bpacáiste ag an nasc seo
Is breá le gach páiste scéal, agus tá an scéalaíocht ar cheann de na straitéisí is éifeachtaí chun teanga a chur i láthair i gcomhthéacs bríomhar agus taitneamhach. Tá béim ar leith curtha ar an scéalaíocht i gCuraclam Teanga na Bunscoile (2019), go háirithe sa Snáithe ‘Teanga Ó Bhéal’.
Trí éisteacht le scéalta agus iad a athinsint, pictiúir a chur in ord, puipéid a úsáid agus páirt a ghlacadh i ndrámaí simplí, tugtar deiseanna do pháistí an Ghaeilge a chloisteáil, a thuiscint agus a úsáid ar bhealach nádúrtha.
Is é sin go díreach a chuireann an pacáiste teagaisc seo ar fáil.
Céard atá sa bPacáiste?
Tá 10 scéal clasaiceach sa gcnuasach, agus gníomhaíochtaí éagsúla a thugann deis do pháistí an Ghaeilge a úsáid trí éisteacht, labhairt, spraoi agus drámaíocht.
Na Scéalta
- Cochaillín Dearg
- Cinnín Óir agus na Trí Bhéar
- An Tornapa Mór
- Na Trí Mhuc
- An Buachaillín Sinséir
- An Chircín Bheag Rua
- Tomás na hOrdóige
- Luaithríona
- Hansel agus Gretel
- Jeaic agus an Gas Pónaire
Príomhghnéithe
- Oiriúnach do pháistí bunscoile, ó na naíonáin ar aghaidh
- Sé phictiúr A4 lannaithe le gach scéal
- Dráma gairid simplí le gach scéal
- Patrúin do mhaisc, do phuipéid láimhe agus do mhéarphuipéid.
- Gníomhaíochtaí a spreagann éisteacht agus labhairt na Gaeilge
- Bealach spraíúil chun stór focal agus patrún teanga a chleachtadh
- Acmhainn phraiticiúil do mhúinteoirí atá ag múineadh Gaeilge sa mbunscoil
Scéalaíocht agus Foghlaim na Gaeilge
Tugann an pacáiste deis do pháistí an Ghaeilge a fhoghlaim trí scéalta a aithníonn na páistí cheana féin. Trí athinsint, pictiúir, puipéid agus drámaíocht, bíonn deis acu an teanga a chloisteáil agus a úsáid arís agus arís eile i gcomhthéacs taitneamhach.
Tá na scéalta agus na gníomhaíochtaí sa phacáiste dírithe freisin ar na chéad chéimeanna i dtreo na léitheoireachta, ag tabhairt blaiseadh do pháistí ar shaol na leabhar, na scéalta agus na teanga scríofa.
Maidir leis an Údar
Is iarléachtóir le Teagasc na Gaeilge i gColáiste Phádraig, Ollscoil Chathair Bhaile Átha Cliath, í Nóirín Ní Nuadháin. Bhíodh sí ag obair le bunmhúinteoirí faoi oiliúint, agus á spreagadh chun scéalta a insint do pháistí mar bhealach éifeachtach leis an nGaeilge a mhúineadh.
Bhí baint aici leis an gCuraclam Gaeilge agus leis na Treoirlínte do Mhúinteoirí Gaeilge (1999) agus tá spéis faoi leith aici i múineadh na Gaeilge sa mbunscoil.
Bíonn sí de shíor ag lorg straitéisí nua agus éagsúla chun cabhrú le múinteoirí an Ghaeilge a mhúineadh agus chun tacú le páistí an teanga a fhoghlaim ar bhealach taitneamhach agus éifeachtach.
Acmhainn Phraiticiúil do Mhúineadh na Gaeilge
Is acmhainn úsáideach é Tomás na hOrdóige do mhúinteoirí bunscoile atá ag iarraidh níos mó scéalaíochta, drámaíochta agus spraoi a thabhairt isteach i gceachtanna Gaeilge. Cuireann sé gníomhaíochtaí simplí, praiticiúla ar fáil a spreagann páistí chun éisteacht leis an nGaeilge, í a thuiscint agus í a úsáid.
Tagairt: Curriculum Online – Uirlisí Úsáide agus Ábhar Tacaíochta (www.curriculumonline.ie).
