Thug Dia na Deich nAitheanta do Mhaois ar bharr Shliabh Shíonái agus rinne na hIosraeilítigh soitheach óir chun na leaca cloiche ar a raibh dlí Dé scríofa a choinneáil slán. Tugadh go hIarúsailéim Áirc seo an Chonartha agus bhí sí i dTeampall Sholaimh ar feadh i bhfad. Ach cá ndeachaigh sí? Mar ní raibh tásc ná tuairisc uirthi nuair a scrios na Bablónaigh an Teampall sa séú céad RCh. Ná ní raibh aon trácht uirthi nuair a scrios na Rómhánaigh an dara Teampall i 70 AD. Ach bhí ráflaí riamh ann go ndeachaigh an Áirc go dtí an Aetóip . . .

Sa leabhar seo leanann Frank Reidy turas na hÁirce ó Iarúsailéim go dtí an Aetóip. Cíorann sé stair agus seanchas na hÁirce agus tagann sé ar thuiscint nua ar an Áirc, ar a stádas agus an tábhacht a bhaineann léi san Aetóip. Tugtar léargas nua anseo ar thír nach mbíonn luaite léi go minic ach ocras, anró agus bás. Os a choinne sin léirítear gáire agus gliondar, aois agus uaisleacht, creideamh agus cairdeas: taisteal, taiscéalaíocht agus tráchtaireacht curtha os ár gcomhair mar lón anama agus machnaimh.

Frank Reidy

Iar-cheannfort airm é Frank Reidy. Le linn a sheirbhís cúig bliana fichead sna Fórsaí Cosanta bhí sé lonnaithe ar Churrach Chill Dara: sa gCór Comharthaíochta, ina cheann ar an Roinn Físe, agus ag léachtóireacht sa gColáiste Míleata ar staidéar na meán. Chaith sé tréimhsí sa Meán-Oirthear agus i Ruanda. Tar éis dó dul ar scor chaith sé seal le RTÉ mar thuairisceoir agus mar thaighdeoir. D’fhill sé ar Ruanda i mbliain an 2000 ag obair do Refugee Trust International. Filleann sé ar an Afraic go rialta ag taisteal agus ag obair go deonach. I Sligeach a rugadh Frank agus tá cónaí air i Ros an Mhíl i gContae na Gaillimhe. Is craoltóir rialta é ar Raidió na Gaeltachta agus ar TG4 ar chúrsaí cosanta agus idirnáisiúnta. Bhuaigh a chéad leabhar, Ó Chósta go Cósta, gradam Leabhar na Bliana i 2010.

Léigh sliocht as an leabhar